تويت
للكفوف العاملة في بلدي
أسماء وأشكال جليلة
أبو سيد ونصّار
وبياع البليلة
وصاحب محل الطرشي
وقُرَشي
ونشال الحتة وابن البلد
وابو ايدين طويلة.
وعبده كرشة
وأكلة حرشة
وأم اشجان وعواطف
وأعيان القبيلة.
وتوفيق أفندي
وعبده باشا ومن عندي
مظلوم وطاحون
واللي عيشته ذليلة.
في بلدي الأصوات اللي تعلى
تعلى مرة من القهر والا
تطق تموت، والحكومة إيديها
ورب الكعبة تقيلة.
في بلدي اللي يشقى
واللي يتعب واللي يبقى
طول الليل يجاهد
في لقمة عيش قليلة.
في بلدي كل أنواع المفاخر
كل أنواع الخناجر
كل أصناف الحناجر
واللي يرفع عينه يجيبوا بديله.
في بلدي أسماء تهز الجبال
تزعزها بالعلم، والمال
للفنانين والرقاصين والقوادين
وتتحول العاهر أصيلة.
في بلدي جمال وعز
وعلاء، وأكل الوز
للي رجله على راس الناس
يدوس المعاني الجميلة.
والمعترض على الحربي
وأبو زعبل ، أي وربي
وورا الشمس، وفي المجاهل
ويالا في داهية: هيلا بيلا.