قـهــوة سُـكَـلانـة_مـلـهـاة شـعـريـة

[ahmed_allaithy]

الـفـصـل الأوَّل

يخرج سُكَلانة في جلباب مهلهل، وعلى رأسه قبعة إفرنجية،
ويخاطب مجموعة مختلطة من الناس في مقهاه، وقد احتشد جمع آخر خارجها.


سُكَلانة:
أنا سُكَلانة، أنا سُكَلانة
متفرج:
مين سُكَلانة؟
متفرج:
دا واد بلبانة
متفرج:
مايص زي البت بهانة
سُكَلانة:
أنا سُكَلانة، أنا سُكَلانة
رأس الدولة يا ناس تعبانة
سوف نقاتلَ كلِّ عميلٌ
مش هنخلّي ما بينَّا جبانا
ياللا ادُّوني من أموالكم
لازم بطني تكون مليانة
مطبل رقم (1):
انت زعيمنا، وانت حبيبنا
مطبل رقم (2):
راح نفديك لو حتى ساحبنا
مطبل رقم (3):
قول ده كلامك يشفي عليل
مطبل رقم (4):
واحنا معاك نازلين تهليل
مطبل رقم (5):
زوِّد زوِّد في التطبيل
مطبل رقم (6):
تصفيق، تصفيق
مطبل رقم (7):
تنظيم ف فريق
مطبل رقم (8):
لازم نعمل ألف دراسة
أصل كلامك كله ...
معارض (1):
نجاسة
شوف الناس ويَّاك محتاسة
مطبل رقم (1):
يا ابني اتعلم كيف تتكلم
معارض رقم (1):
دا انت يا دوب ما تجيب ...
معارض رقم (2):
رقاصة
سُكَلانة (للمعارضين):
انتو حثالة، انتو زبالة
مطبل رقم (1):
ما يْكَفِّيكُم ألف رصاصة
سُكَلانة:
احنا بتوع النهضة الشامْلة
متشكك رقم (1):
باين إنه هيعمل عَملة!
سُكَلانة:
نحن حمـاة العقل الشامخ
معارض رقم (3):
والله ده كل كلامك ماسخ
معارض رقم (4):
باين واكل كيلو سبانخ
معارض رقم (3):
بص لحالك تعرف إنَّك
كل بلاوي الدنيا دي منَّك.
مطبل رقم (2):
قول يا زعيم الكل يا غالي
مطبل رقم (3):
رايح أعطيلك كل اموالي
مطبل رقم (4):
لو راح تطلب مني عيوني
أو أدبح لك ...
مطبل رقم (5):
كل عيالي
مطبل رقم (6):
كل كلامك شهد وسكـر
مطبل رقم (7):
كل حديثك ورد معطَّر
مطبلة رقم (1):
أنا من رأيي تروح تتبَخَّـر
مطبل رقم (1):
هات المنقد ياللا بسرعة
يحضر المطبلون منقد البخور، وتشير المطبلة رقم (1) إلى سُكَلانة ليمر من فوقه
مطبلة رقم (1):
خَطِّي يا "سوكة"؛ النار اهي والعة
أنا هاكفيك م العين وارقيك
مطبلة رقم (2):
حصوة ف عين اللي يعاديك
يا للا يا جوز السعد اتمشكح
مطبلة رقم (1):
لاجل العفاريت منك تشطح
مطبلة رقم (2):
قولوا معايا يا ناسُ ورُّونا
سوكة حبيبنا واخونا وابونا
المطبلون:
سوكة حبيبنا واخونا وابونا
مطبلة رقم (2):
غرزة ف عين اللي حسدونا
المطبلون:
غرزة ف عين اللي حسدونا
مطبلة رقم (1):
حُط الْمِسْتِكَى ع السُّبّيط
المطبلون:
خلِّي العُملا الخَوَنة تشيط
سُكَلانة:
أنا مش عارف كيف اشكركم
داهية تاخدكم، موتة تشيلكم
أقصد .. قصدي .. تشيل أعداءكم
انتو الرَّبع، النبض الغالي
لو هتزيدوا من أموالي
كل فلوسكم تبقى حلالي.
كرشي واجعني ...
معارض:
دا برضه قلِيل.
معارض رقم (1):
بس يشيل م المال براميل.
سكلانة:
فين يا جماعة العقل الأكبر؟
مطبل:
قصده يا اخويا الدكتُر شَنبر
متفرج:
دكتُر شنبر؟ امتى اتدكتر؟
شنبر:
آه لو تعرف، آه يا سلام
يا زعيمنا، يا ملهم، يا هُمام
لو تتحقق دي الأحلام
كنت ادبح لك "كاو" cow أو "لام" lamb
آدي اللوحة دي نمبر "وَن" (one)
متفرج:
مش هَيْبَطَّل شنبر زَنّ.
مطبل رقم (2):
انت يا دُكْ مش شنبر واحد
انت يا جهبذ أورطة شنبرز (s)
راح ندِّيلك ...
معارض رقم (2):
دستة پمپرز (pampers)
شنبر:
أنا متشكر قوي يا جماعة
أصل زعيمنا خبير ...
معارض رقم (2):
فِ صياعة.
مطبل رقم (1) (فصيح المقهى):
إنَّ كَلامُ سُكَلانَه بليغٌ
يَسْتَوْجِبَ مِنَّـا تَبْلِيغٌ
سَوْفَ أُنَاضِلَ، أَكْتُبَ شِعْرا
يَجْعَلَ مِنْ أَعْدَاؤكَ صِفْرا
أَمْسَحَ بِهمُ رَغْماً قَسْرا
كُلِّ بَلاطٌ شِبْراً شِبْـرا
متفرج:
مين هذا المهبول التاني؟
متفرج:
آه يا نافوخي، آه يا ..
متفرج:
وداني.
مطبلة رقم (1):
قول يا شاعرنا، كلامك يفرم
كل حسـود متغاظ أو مجرم
انت تألِّف واحنـا نترجـم
لازم كل العالم يقـرا
دا انت يا روحي ...
معارض:
زفت مسخَّم.
مطبل رقم (3):
أنا خبرة ف أشغال الحاسب
معارض:
ولا تعرف موجب من سالب
مطبل رقم (3):
ولا أسمح بالعبط الغالب
على كل كلام الحساد
ودفاعنا ...
عن سوكة ده واجب.
مش عايز واحد يضايقني
ولا واحد يقدر يحاربني.
أنا عارف كل الأسرار
هاتكلم وهاشعلل نار
ويا ويلُه اللي يقول لي ...
معارض:
حمـار؟
مطبل رقم (4):
وسَّع وسَّع، إنتَ وْهُوَّه
راح أضرب أجدعها فتوة
أنا شاعر لبنان الفوقي
متفرج:
الفاتحة لحافظ ولشوقي
مطبل رقم (3):
أنا حامل راية سُكَلانة
أفديكَ بروحي يا مولانا
الكلمة تقولها ونسمعها
والضربة نمد لها ...
معارض رقم (4):
قفانا.


يشتبك المطبلون والمعارضون والمتفرجون والمتشككون في عراك، بينما يسدل ستار الفصل الأول.

[ahmed_allaithy]

ملهـاة شعـرية_قهوة سُكَلانة

الفصل الثاني
المشهد الأول

سكلانة:
أنا راسي يا زوبة هتتفرتك
محتاج لكلامك، لمشورتك
مطبلة رقم (2) (زوبة):
أنا رأيي بنعمـل لك زار
ونجيب لك بيضة ومسمار
والكودية هتعمل لك دقَّة
وتطفِّش كـل الأشـرار.
سكلانة:
والله براوة عليكي يا زوبة
دايماً ناصحة، كمان لهلوبة
وحياتك لاعمل لك شهرة
ما اتعملت حتى لكركوبة
زوبة:
تسلم، دا انت النور ف حياتي
سكلانة:
وانت الأَلْفَـة ما بين ستاتي.
شوفي يا زوبة وقبل ما تمشي
أنا حاسس بالهرشة ف كرشي
زوبة:
يبقى معاد الْخُطبة يا سوكة
سكلانة:
لازم خِطة تكون محبـوكة
زوبة:
والعُمْي بتوعنا مافيش منهم
سكلانة:
بالجزرة هنفضل ساحبينهم
دي حثالة، وملعون أيْمانْهم
فاكرين قال يعني راح اصونهم
زوبة:
على رأيك! بس اعمل حالك
مسكين، ومكرس أعمالك
ف سبيل النهضـة العربية
سكلانة (يقهقه):
يخرب عقلك كـده يا وليّة
زوبة (تقهقه):
تلميذتك ف المكر قويّـة
سكلانة:
طب روحي، وجهِّزي للزار
وانا عنـدي شوية أفكـار
مش ممكن هيخُرُّوا الميَّـة
زوبة:
قل لي يا سوكة وفرَّح قلبي
ياللا يا راجل، قول ما تخبِّي
سكلانة:
هاعلنهـا ومن غير إنذار
وهاراسل وكالات أخبار
إني رئيس ...
زوبة:
القـارة السابعة.
وحياتك كلمتي ما هي راجعة.
سكلانة:
ماشي كلامك والله يا زوبة
دا انت صحيح تلميذة أروبة.

تنصرف زوبة للتحضير لدقة الزار، بينما يجلس سكلانة يفكر، وينسدل ستار المشهد الأول.

[ahmed_allaithy]

_md_re: ملهـاة شعـرية_المقهى الثقافي

الفصـل الثـاني
المشهـد الثـاني

(تدخل زوبة على كودية الزار أم شبانة).
زوبة:
حابس حابس، يا ام شبانة
كاملة وعاقلة وعين مليانة
بَرَكِة شحبـر، بركة مانة
جايّة لك والقلب داعي لك
تشوفي لي حل ف سُكلانة.
أم شبانة (كودية الزار) (وهي تلقي بمرزنجوش وخولنجان وزعتر على منقد البخور):
هشهش هشهش فشفش فشفش
رشّ الزعتـر لما يطشطش
ياللا يا شَحْبَر، قوم يا محشش
جوّة العلبـة تنام وتعشش.
ثم تلتفت إلى زوبة:
أيوه يا شابة، ده طلبك عندي
ربع جرام من القسط الهندي
ويّا سليخة وقشـر لاوندي
هتلاقي المهروش بقى غاندي.
زوبة:
تسلم راسك يا ام شبـانة
ف جمايلك أيوه انا غرقـانة
كله يهون ف سبيل سُكلانة
وحلاوتك مضمونة أمـانة.
أم شبانة:
لأ يا حبيبتي الدفع مقدم
عفاريت الجن ما تتقدم
ولا خطوة من غير عربون
والدفع مقدم كده أسلم.
زوبة (تبحث في جيوبها، في تردد واضح)
أصلي ماعيش دلوقتي كفاية
أم شبانة:
جايّة تلاوعي يا بت معايا؟
وحياة عنكر لأقلبهـا لك
وفوقيها هاكَدَّر لك حالك.
زوبة:
يستر عرضك لأَّه بـلاش
حابس حابس يا القشاش
خدي يا اختي نص الأتعاب
أم شبانة:
والباقي؟
زوبة:
أهو بينَّا حسـاب.

تنصرف زوبة وهي تتمتم وتردد تعاويذ غير مفهومة.

أم شبانة:
جـايّة الفـالحة عليَّ تدور
وانا راسية كده ع المستور
أهي ديتها الواد شحبـور
وعْنيهُم ما تشوف الاّ النور
لو ضحكـوا عليَّ ف مليم
راح البِّس جوزها الطرطور.

(ترش أم شبانة بعض الفقاح على منقد البخور، وتشهق شهقة عالية، بينما ينسدل الستار).

<!-- / message --><!-- sig -->

[ahmed_allaithy]

قهـوة سكلانة

الفصل الثاني
المشهد الثالث

سكلانة في مقهاه، وحوله المطبلون، ونفر من رواد المقهى

سكلانة
أنا مش طايق نفسي يا ناس
حرقـة دم ووجعـة راس
مفروض إيدي يا ناس تنباس
أنا قاعـد وبقى لي سنيـن
وباجعجع في طابون وطحين
إنتو حميـر مش بني أدمين.

المطبلون في صوت واحد:
إحنا حمير مش بني أدمين.

مطبل:
قول يا زعيم، سامعين سامعين.

متفرج:
رغم كلامك مش فاهميـن

مطبل:
اسكت ياد يا ابو مخ تخين.

سكلانة (يصرخ بأعلى صوته)
حتى الطرش كمان سامعينّي
كل الدنيـا بتكتب عنّـي
أنا شخصيـة وليها تأثيـر

متفرج:
امسح وشّك م البرابيـر

سكلانة
كل العـالم منّـي تغيـر
لازم نعمل نهضـة عظيمة
سيما ومركز وحاجات قيمة
شوفوا القهوة يا فِشْل حماري
هي دي أعظم صرح حضاري
وعايزين نبني عمارة كبيرة

متفرج:
باين زوِّد ف التعميرة!

سكلانة:
30 دور وشقق ومكاتب
مين يا عيال يفهم في الحاسب؟

مطبل رقم (3) توتو (يهب واقفاً ويقول):
إنني عـارف! إنني فاهـم!

متفرج لآخر:
مخ جنابه ده مخ طماطم
عامل فيها خبير وقضيـة
ومجالس وشئـون قانونية
وقرائن والخيبـة قويّـة

تـوتـو (يتلفت حول نفسه):
أنا سامع واحد فلتـان
مُتَفَيْقِـه وبنص لسان
وقروني بتلقط إشارات
باستشعر كل الحركات
أنا أصلي زي الـ ...

متفرج
حشـرات.

سُكلانة (وقد نسى سؤاله):
أنا أعرف كانَ ويكـون

متفرج:
لأ، قصدك خانَ ويخـون

سُكلانة يرد عليه:
امشي يا تافه! واد ملعـون!
فاكر نفسك كده ف طابون؟

متفرج:
باين إنه يا ناس مجنـون.

سكلانة:
روح أقعد ف مكب زبالـة

متفرج:
ما انا قاعد عندك يا حثالة

تـوتـو:
اطلع بره، عليك اللعنـة

مطبل رقم 4:
أصلك نيلة ومن غير معنى

مطبل رقم 1:
اخرج مدحـورا مشتوما
معتوهاً وكمـان مرجوماً

متفرج:
يا اخي خيبتك فتلة وملضومة
اسم الله عليك يا ابو زلومـة.

مطبلة رقم 1:
الوكسة عليك تبقى شوية

متفرج:
مالِك؟ ما تفوقي يا وليّـة!

مطبلة رقم 3 (دُبْدُب):
اللي يعارض سوكة يا عالم
لازم حتما مخّـه ده وارم
وسفيه طبعاً واكبر ظـالم

متفرج:
باين إنّك وش محاكـم

دُبْدُب:
(تنظر إلى سُكلانة، وتسبل عينيها، وتتابع قولها) :
شوفوا شلاضيمه ... سكر عايم

سُكلانة:
شكراً دُبدُب أدبِك عالي
وكلامك من النوع الغالي
(ثم يميل عليها ويهمس)
وهاضمّك لمـراتي وعيـالي
نرجع تاني يا ناس مرجوعنا
اللي بدأت أنا بيه موضوعنا
من غير دوشة وزدنا وعِدنا
أنا عارف كـانَ ويكـون
وكلامي دا حكمة وموزون
والعيبة ما يعرفهـا لسـاني
حتى ان واحد مـرة أذاني

متفرج:
اللي بيمدح نفسه شيطاني
خفِّ شـوية لتتعب تاني

سكلانة:
امشي يا مجرم، كلب، حقير

متفرج:
ده جنابه ف الردح خبير
يتكلـم من غير تفكيـر

متفرج:
ولا يعرف مِلة وضميـر

سُكلانة:
أنا هاحجـر أمك وأبـوك
وجيـرانك واللي يحبـوك
واصْحابك لو جُم وزاروك
واللي ف مرة كمان عرفوك.

مطبل رقم 1:
احنا معاك ع الخط تمام

مطبل رقم 2:
اللي يعارضك لُه إعدام

مطبل رقم 4:
يا مزلزل كل الأركان

تـوتـو:
يا مشعلل مثل البركان

مطبلة رقم 1:
ده كلامك سحر وألحـان
حسادك أشكال والـوان
إكمنّك راجـل مليـان
في شهامتك أنا كلي إيمان.

متفرج:
والله دي ناس واكلة بْدِنْجان

متفرج:
قاعدين باين في مورستان
قوم يا شلاطة الحق علينا
احنا جرينا وراه برجلينا

شلاطة:
اكتم نَفَسَك بقى ف مكانك
واطلع م القهـوة لدُكَّانك
واذكر ربك قول غفرانك
(يخرجان من قهوة سكلانة وهما يتمتمان)

مطبل رقم 1:
ياللا ف داهية حَوَش وبغال

سكلانة:
ع الصحـرا ياللا يا أندال.

تـوتـو:
عمِّنا سُكسُك سيبني عليهم
أنا ممكن لاجْلَك أتاويهـم
وافضحهم عن أصل أبيهم
وهابهدل أتخن من فيهـم.

متشكك:
اسكت يا ابني وجعت دماغنا
كل كلامك مالهوش معنى
ابعـد عنَّـا بقى وريحنا

سُكلانة:
شوفوا يا جماعة انا باعزمكم
على دقة زار تسوى مقامكم
نتبحبح فيهـا وقدامكـم
هادبح مية قُطة عشـانكم.

مطبل رقم 5:
أفكارك ما في أروع منها

مطبل رقم 6:
عفاريت الزار هنجننهـا

مطبل رقم 7:
هنجيلك يا حبيبنا يا جهبز

مطبل رقم 8:
في قلوبنا مكانك ف المركز

مطبلة رقم 1:
لو تيجي عليَّ وتتعكـز
أنا جنبك، ياللا كده ركِّز.

المطبلون
(في صوت واحد، وهم يتبعون سُكلانة الذي يستند على كتف المطبلة رقم 1، متجهين إلى خارج القهوة):
حط الوردة على الجعضيض
قلب زعيمنا بياض البيض
سوكة سوكة يا رمز النور
انت التيس واحنا الحنطور.

تعلو الهتافات وتختلط الأصوات بينما ينسدل ستار الفصل الثاني.

[عبدالرحمن السليمان]

_MD_RE: قهـوة سكلانة

<p style="margin: 0cm 72pt 0pt 0cm; text-indent: 36pt;" dir="rtl" class="MsoNormal"><strong ><span lang="AR-SA" style="font-size: 20pt; font-family: &quot;traditional arabic&quot;;">رائعة هذه المسرحية يا دكتور أحمد في </span></strong><strong ><span lang="AR-SA" style="font-size: 20pt; font-family: &quot;traditional arabic&quot;;">سُكَلانَه المجنون وشاعره القائل:</span></strong></p><p style="margin: 0cm 72pt 0pt 0cm; text-indent: 36pt;" dir="rtl" class="MsoNormal"><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;">إنَّ كَلامُ سُكَلانَه بليغٌ</span></strong></font></p><p style="margin: 0cm 0cm 0pt;" dir="rtl" class="MsoNormal"><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;"><span > </span><span > </span>يَسْتَوْجِبَ مِنَّـا تَبْلِيغٌ</span></strong></font></p><p style="margin: 0cm 0cm 0pt;" dir="rtl" class="MsoNormal"><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;"><span > </span><span > </span>سَوْفَ أُنَاضِلَ، أَكْتُبَ شِعْرا</span></strong></font></p><p style="margin: 0cm 0cm 0pt;" dir="rtl" class="MsoNormal"><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;"><span > </span><span > </span>يَجْعَلَ مِنْ أَعْدَاؤكَ صِفْرا</span></strong></font></p><p style="margin: 0cm 0cm 0pt;" dir="rtl" class="MsoNormal"><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;"><span > </span><span > </span>أَمْسَحَ بِهمُ رَغْماً قَسْرا</span></strong></font></p><font color="#ff0000"><strong ><span lang="AR-SA" style="font-size: 20pt; font-family: &quot;traditional arabic&quot;;"><span > </span><span > </span>كُلِّ بَلاطٌ شِبْراً شِبْـرا<br /><font color="#000000">في المسرحية حبكة ومعان لطيفة جداً لا تخفى على ذي نظر وكذالك <img alt=" " src="http://www.wataonline.net/site/uploads/smil3dbd4daabd491.gif" /><img alt=" " src="http://www.wataonline.net/site/uploads/smil3dbd4daabd491.gif" /><img alt=" " src="http://www.wataonline.net/site/uploads/smil3dbd4daabd491.gif" /> وكنت أتمنى لو خصصت فيها فصلاً للكرباج<img alt=" " src="http://www.wataonline.net/site/uploads/smil3dbd4e5e7563a.gif" /><img alt=" " src="http://www.wataonline.net/site/uploads/smil3dbd4e5e7563a.gif" /><img alt=" " src="http://www.wataonline.net/site/uploads/smil3dbd4e5e7563a.gif" />وأظن أني أستبق الأحداث <img alt=" " src="http://www.wataonline.net/site/uploads/smil3dbd4e4c2e742.gif" /><img alt=" " src="http://www.wataonline.net/site/uploads/smil3dbd4e4c2e742.gif" /><img alt=" " src="http://www.wataonline.net/site/uploads/smil3dbd4e4c2e742.gif" /></font></span></strong></font>

[ahmed_allaithy]

قهـوة سكلانة_الفـصـل الـثـالـث

الفصل الثالث
المشهد الأول

مطبل رقم 5 (بسطام) (يقوم بالإعلان عن الزار):
يا زباين إسمعوا م الآخر
عندنا زار، والبث مباشر
في القهوة على شاشة كبيرة
متفرج:
بالمشاريب؟
بسطام:
لأ بالتعميـرة.
مطبل رقم 6:
اكتم، اقفل، بدأ البث
مش عايز أنا منكم حِس

يظهر بيت سُكلانة من الداخل وقد اجتمع فيه جميع المطبلين رجالاً ونساءاً، وأم شبانة كودية الزار وفرقتها.
سكلانة:
أم شبانة، يا أم شبانة
نفسيِّتي م الناس تعبانة
كل الناس بيشاوروا عليَّا
ويقولوا ف مخي دا أكلانة!
زوبة:
أم شبانة بحـالك عـارفة
مكشوفة وعفاريتها الكاشفة
تفهم في التافهة وفي الهايفـة
سكلانة:
لما صحيح الهرشة تْجيني
بتشحور مخي ومصرايني
وبلاقي الدنيا بقت ضلمة
واتعصَّب وتثـور زرابيني
أم شبانة:
فضفض فضفض، قول ما تخافشي
دا انا هاعمل لك زار ما حصلشي
سكلانة:
بتجيلي مشـاعر نسائيـة
ووساوس، أعراض مرضية
دا انا لحم ودم وأعصاب
وما حدش راح يسأل فيَّا
دُبْدُب:
أيوة يا غالي صعبت عليَّـا
أم شبانة:
طلبك عندي، يا عيني يا ضنايا
بس تركِّز كـده ويَّـايـا
اقلع ياللا هدومك، صِيـح
زي القرد، وقول يا فصيـح
طـاخ طيـخ
سكلانة:
طـاخ طيـخ
أم شبانة:
طلَّع م الأرض البطيخ
سكلانة:
طـاخ طيـخ، طـاخ طيـخ
أم شبانة:
بسم الجن الأزرق ف احمر
لازم بالمشعـوف تتبخَّـر
سكلانة:
طـاخ طيـخ، طـاخ طيـخ
أم شبانة:
ياللا تعالى، وْلِفّ معايـا
قول شحبر وشامـوش ويَّايا
سكلانة:
ياللا يا شحبر، ياللا شاموشي
أم شبانة:
ياللا بسرعة، ازاي ما تجوشي
سكلانة:
ياللا بسرعة، ازاي ما تجوشي
أم شبانة:
طـاخ طيـخ
سكلانة:
طـاخ طيـخ

ينضم جميع المطبلين إلى سكلانة وزوبة وفرقة الزار ويدورون حول أنفسهم وهو يقولون:
طـاخ طيـخ، طـاخ طيـخ
طلَّـع م الأرض البطيـخ
يأخذ ضرب الطبل العالي بعقول الجميع ويخرج المطبل رقم (1) منشداً:
أيها الراغبـون سلخ خـروفي
قد طلبتـم ضمـانة بولائـي
إن مأمأ المسكوك يطلب شربة
قدمت ضـرعي سائغـاً ...
متفرج في القهوة:
بغبـائي
المطبل رقم 1:
نحن الفـداء وكلنا سكـلانة
فلا عدمتم نطحـه وثغـائي.
أم شبانة:
اتلهي يا ابني وشوف لك داهيـة
دا انت يا اخويا جايب له الكافية
أم شبانة لسكلانة:
أرقد على بطنـك واتغطَّى
وهندبح فوق راسك قطة
تشرب دمَّها، تدهن وِسطَك
والباقي نلبَّخ بُهْ ...
زوبة (تقاطعها وهي تضحك في خبث):
وِشَّـك.

يـتـبـع

[ahmed_allaithy]

_md_re: قـهــوة سُـكَـلانـة_مـلـهـاة شـعـريـة

يرقد سكلانة على الأرض ويقف على ظهره أحد صبيان الكودية وهو عارٍ إلا من قمطة حول وسطه، ثم يذبح قطة يسيل دمها على جسد سكلانة، وبعدها يبول على رأسه.

سكلانة:
طاخ طيخ، طاخ طيـخ
طلَّع م الأرض البطيـخ
حِتِّة دُش تمـام مزبـوط
أم شبانة:
لَبِّسُه يا ابني كمان زعبوط
زوبة:
ينصر يامُّ شبانة عفاريتـك
كان لازم من بدري انا جيتك
شنبـر:
أنا عندي ملحوظة سبِشيال (special)
وكلامي إليكم راح يوصل
سُكلانة ... انت بقيت مِنْتال (mental)
مطبلة رقم 1:
شنبر اوعى تخطّي حدودك
دبدب
ملعون أسلافك وجـدودك
متفرج في القهوة:
شنبر قَرَّب ياخد بمبـة
متفرج آخر:
يستاهل ما هو أصله كرنبة
سكلانة:
طاخ طيخ، طاخ طيخ
شنبر انت سفيـه وبهيم
مطبل رقم 1:
وما ينفع في بهيم تعليـم
شنبر:
آدي أخرتها معاك سُكلانة
أنْصَحْ وِتْجيلي برضه إهانة؟
متفرج:
صحِّ النوم أيوه يا مولانا!
مطبل رقم 2:
انت هتعمل لنا شغلانة؟
تـوتـو:
أنا يا معلِّـم هاخـد تارك
بالحاسب هامسح لك عارك
شنبر، عندي انا كل اسرارك
أصل انا خبرة ف شغل الحاسب
سكلانة:
اسكت كل كلامك خايب
مطبلة رقم 1:
كل دقيقة تقول حواسيب
وعيـارك طايش ما يصيب
زوبة:
ولا عندك في الدنيا دي فكرة
دُبْدُب:
وبتصطاد ف الميّة العِكْـرة
تـوتـو (وهو يرتعد):
طيب هاسكت مش هاتكلم
ده أنا أفديك بالروح يا معلِّم.
شنبر (وهو يخرج مطروداً من الزار):
راجل نَطْع، مالُهش أمـان
عامل فيها يا ناس غلبـان
ولسـانه بمليـون تِعبـان
متفرج من القهوة:
ودماغه معششـة أَكَـلان.
مطبلة رقم 1:
ياللا ف داهية، تروح ما تجيش
كل شوية انا عندي سبيتش speech
دُبدُب:
ودماغك مدهونة ورنيش.
مطبل رقم 1:
باين شـارب نص حشيش
شاعر لبنان:
إكسري قُلَّة يا بِت وراه
خَلِّ النحس يْهِجّ معـاه
تـوتـو:
كان فاكر قال نفسه بيفهـم
دُبدُب:
وكلامه يا ساتر ما في أتلـم
أم شبانة (تتمتم):
طاخ طيـخ، طاخ طيـخ
دم القطـة وريحته فسيخ
حابس حابس بالقبـاقيب
خلِّي مفـاصل عقله تسيب
سكلانة:
يا جُمُـوع الأمة العربية
أنا واقف امِدِّلْكو ايديَّـا
أنا سِيدكو وتاج راس أهاليكم
ومافيش حاجة بتتمـر فيكـم
انت يا صايع انت وهـوَّه
ولا واحد فيه عنده مْـرِوَّه
ياللا تعالوا وع الأكتـاف
ارفعوا سيدكـو، وهات يا هتاف
راحَ أكِّلْكُم عيش م الحاف

يجري إليه المطبلون جميعاً ويرفعونه على أكتافهم بينما يتساقط ما علق به من دم وبول على وجوههم، وهم يهتفون.
المطبلـون:
حُطّ التبْن على البرسيـم
سكلانة دا أجدعها زعيـم
هات الحبل وهات الجـزرة
واحنا وراك نبصم بالعشرة

يستمر المطبلـون في هتافهم بينما ينقطع البث وينسدل الستار.

يـتـبـع ...

<!-- / message --><!-- sig -->

[ahmed_allaithy]

قـهــوة سُـكَـلانـة_مـلـهـاة شـعـريـة_الفصل الرابع

الفصل الـرابـع
المشهـد الأول

صباح اليوم التالي في المقهى.

سكلانة:
أنا باعلن أعظم إنجـاز
وباقولها بفخر وإعـزاز
إن نجاحكم ليلة امبارح
يثبت إنّكـو ..
معارض:
خلق شواذ
معارض:
ولَّع نفسك ياللا بجـاز
سكلانة:
اسكت يا سليل الإجرام
يا مُهزَّئ يا ابن الأقـزام
مطبل رقم 1:
ازاي تجـرؤ كده تتطـاول
على سيدك، وده مهما تحاول
مش ممكن توصـل للنخلة
معارض:
ياخِي إشرب ويَّاه م الوحلة
معارض:
جتكوا النيلة بقـر وتيـوس
انت حمـار لزعيم متعـوس
واقف وسط الناس بلبـوص
قاعد في الخيبـة ومجعـوص
فاكر نفسه كبيـر ع الفاضي
وهوَّ يا ناس حِتِّـة مفعـوص
سكلانة:
أنا باصدر م الآن فرَمان
مش عايز لفّ ودوران
يتنفذ بالحرف كلامـي
فاهمين يا حدادي وغربان؟
المطبلون:
قول يا زعيم كلنا باصمين
دا انت كلامك ...
معارض:
زفت وطين
سكلانة:
لو يطلع فيكم هلفـوت
وكلامه ده معجون ملتوت
مش هيلاقي غيـر الشلوت
معارض:
والله كلام واحد ...
معارض:
مسخوط
يستاهل ضرب النبوت
متفرج (يستهزئ):
طاخ طيخ، طاخ طيخ
طلَّع م الأرض البطيخ
مطبل 1:
امشي لاَحُطّ ف بطنك سيخ
متفرج:
هو انا يعني طالع م الجنـة؟!
سكلانة:
امشي عليك م الرب اللعنـة!
دا انا حاجج، ودعايَّ مقبول
متفرج:
أما صحيح عَيِّـل مخبـول
سكلانة:
بَدَل العُمـرة عامل عشرين
معارض:
ومـوالي كـل الشيـاطين
سكلانة:
في العقل ما فيش أحسن مني
متفرج (يضحك):
بأمـارة دكتـورنا شاهيـن!
سكلانة:
امشي يا متطرف يا موسادي
يا عدو النهضة، يا مُعـادي
معارض:
دا انا لو منّك أدبح نفسي
مطبلة رقم 1:
وحياة سوكة هتلبس كرسي
سكلانة:
أنا يا جماعة زهقت خـلاص
وباقولها انا ليكـو بإخلاص
إنِّي هاسيبكم واختاروا بينكم
حـد يشيل عنِّي متاعبكـم.
مطبل 1:
لأ يا زعيم رافضين رافضين
مطبل 2:
دا احنا بدونك مش نافعين
تـوتـو:
ترضى نكون بعدك صايعين؟
مين للحاسب غيرك مين؟
مطبلة 1:
مش ممكن راح نرضى بغيرك
زوبة:
دا احنا كمان عايشين من خيرك
مطبل 4:
وحياتك ما تسيبنا نلـوص
مطبل 5:
راح نغرق ف خراب ونغوص
مطبل 6:
نفديك بارواحنـا وبدمـانـا
مطبل 7:
يا حبيبنـا يا أجـدع سكلانة
مطبل 8:
من غيرك يقدر يهدينـا
دبدب:
وينـوَّر أحلك ليالينـا
زوبة:
ف البرد حنانه يدفّينـا
مطبلة 4:
وبيسهر طول عمره علينا
سكلانة:
أحرجتوني .. أحرجتوني
أنا عارف إن انتو بدوني
هتضيعوا ف صحرا ومتاهات
وهَتِبْقُـم جيفـة وأمـوات
وحياتكم ما هتسوى العيشة
وهترجعوا كـومة حثـالات.
مطبل 1:
انت زعيمنا فاهمنـا تمام
مطبل 2:
يا قائدنا يا رمز الإقـدام
مطبلة 1:
أُؤْمْر، واحنـا نلبي قـوام
سكلانة:
بقى مش عايز كُتْر كـلام
شخلل جيبك ياللا وهات
فضِّي جيوبك م الدولارات
أنا مش ناقص بقى حركات
مطبل 1:
أنا هاكتب ف النهضة قصايد
وهامجَّد في زعيمنـا الخالـد
سكلانة (يتمتم):
انت عبيط والنعمـة وخايب
سكلانة (بصوت عال):
أصل الشعر بدونك عايب
زوبة:
مين يتبرع؟ مين هيناضل؟
يسند ضهر زعيمنا ...
متفرج:
المايل.
سكلانة:
أنا هاقبـل منكم دولارات
نقـداً وكمـان بشيكـات
ولا واحد يطلب خدمـات
دا كفاية وجودي يا حضرات.
مطبل 2:
أيوه رضينا بكل كلامك
مطبل 3:
دا احنا عبيد ونبوس أقدامك
مطبل لبنان:
بادعي المولى يزيد ف مقامك.
مطبل 4:
اهتف ياللا معايا وقـول
سُكلانة ده مش معقـول
حط الحِنَّـة على التُّرُمَاي
احنا بدونك ف الباي باي
ولَّع شمعـة ف قلب فانـوس
انت الفحل ف وسط جاموس.

يردد المطبلون الهتافات، ويقف سكلانة بينهم ملوحاً بذراعيه في الهواء في نشوة عارمة، بينما ينسدل الستار.

<!-- / message --><!-- sig -->

[ahmed_allaithy]

_md_re: قـهــوة سُـكَـلانـة_الفصل الرابع_المشهد الثاني

(سكلانة وزوبة يتحدثان، ثم ينادي سكلانة على توتو الذي كان جالساً في ركن غير بعيد.)
سكلانة:
انتَ يا توتو، يا متعاص جِلَّة
توتو (يقفز مستجيباُ):
أمرك سيدي، يا زينة الشِّلَّة
سكلانة:
بطَّل ياد شُغْل التتنيح
أصل انا عارفك جحش وميح
صح كلامي؟
توتو (هازًّا رأسه):
أيوه صحيح.
سكلانة:
شوف يا مدهول،
توتو:
أيوه يا سِيد.
أُؤْمُر دا احنا نبوس ف الإيد
انتَ السَّيِّد، واحنـا عبيد
سكلانة:
روح واتجسس هنا وهناك
عايزك تنقل كل جديد
توتو:
ماشي، فُرِّيرَة
سكلانة:
وهاستناك.
إن جاب سيرتي عدو وقال
فيَّ كلام مقلـوب بطَّال
توتو:
راح البَّخ له وَارُدّ عليه
واخْلِف بين إيدُه ورجليه
واعمل بَالُّلو كده وحركات
والذي منه غير الهتافـات
سكلانة:
وتهددهم بالأسرار
وفضايح من قلب الدار
توتو:
أسرار أيه يا معلم قول؟
سكلانة:
أمَّا انَّك بقف ومسطول
أهو تهديد وخلاص يا بهيم
توتو:
أيوه فهمت، خلاص يا زعيم.
أنا هاضربهم ضربة قوية
واعمل فيها شهيد وضحية
سكلانة:
تبقى يا واد ميَّة على ميَّة
توتو:
راح اغيَّر كل المواضيع
هاشتري مرَّة، ومرَّة هابيع
واللي يقول الحق يضيع

يخرج توتو مهرولاً، وفي طريقه يقابل أحد الزبائن فيقفان يتحدثان،
بينما تخاطب زوبة سكلانة

زوبة:
انت تآمن توتو يا سوكة
واد غدَّار ومالُهْش أمان
زي البت ونَقْصاها توكة
لَتْ وعَجْن، وطقم سنان
سكلانة:
ايوه انا عارفه ما عنده ضمير
بس ف شغله حمـار وكبير
رغم انا فاهمه، دا دون وحقير
زوبة:
ما انا عارفاك فهيِّم وقراري
مرة تلعلع، مرة تَّداري
بس انا خايفة عليك يا زعيم
أصل الواد غـدَّار ولئيـم
سكلانة:
لأ ما تخافي، دا واد بكَّاش
زي الكلب وخدمة بلاش
عيب الواحد يسحب كلبه؟
زوبة:
والسلخانة؟
سكلانة:
بعيد عن شنبه.

(في الطرف الآخر يتبادل توتو وأحد الزبائن الحديث)

الزبون :
رايح فين يا عبيط القهوة؟
داهية تشيلك كده على سهوة
توتو:
رايح عند جماعة الحق
لاجل اتجسس واعمل شق
الزبون:
طب يا حمار دا الحق جميل
لازم دايماً عنده تميل
توتو:
أيوه انا فاهم بس مصالح
مرة نعادي، ومرة نصالح
عمنا سوكة واعدني كمان
الزبون:
سوكة بيوعد؟ والله جنـان!
توتو:
أصله واعدني بطقم سنـان
غير منصب وف أعلى مكانة
هابقى الريس ع السلخانة
الزبون(ضاحكا):
باين راسك كده تعبـانة
سوكة يا جحش بتاع مصلحته
ما يهموش أمُّه ولا أختـه
ساعة الجد ما يعرف ابوه
وانت تغني عليك ظلمـوه
ده نصَّاب وبيسرح بيـك
بكره يشوطك أو يتـاويك
توتو:
كل الناس فاكراني بهلـول
بكره تشوف مين فينا هيطول
كل ما نِفْسه بتتمنَّـاه،
مين هيغني ويقـول آه
الزبون:
فسَّر قول لي دا قصدك أيه؟
توتو:
بكره تشوف مين فينا البيه
سوكة دا قفل ومخه تخين
محسوب كده ع البني أدمين
وانا باستعبط حبَّـة عليـه
لاجل ماجرجر كده رجليه
هاخد منُّه حبابي عنيـه
الزبون:
بكره نشوف يا ابو عقل مريض
مين هيكـاكي، ومين هيبيض.

(ينصرفان وينسدل الستار)

[ahmed_allaithy]

قـهــوة سُـكَـلانـة_الفصل الرابع_المشهد الثالث والأخير

الفصل الـرابـع
المشهـد الثـاني


سكلانة وشلة منتخبة من المطبلين في غرفة منفصلة ملحقة بالمقهى. يدخل عليهم توتو مسرعاً ومنفعلاً وهو مقطوع الأنفاس.

توتو:
أخبار طازة، أخبار طازة
وع الفرَّازة
سكلانة:
قول لاخبط خالتك بازازة
توتو:
بقى يا معلِّم ...
زوبة:
قول واتكلم!
سكلانة:
لسَّه مبلِّم؟
توتو:
أصلي عليك يا حرام باتألِّم!
سكلانة:
قول يا اهبل يا قصير التيلة
دُبدُب:
يا مشحَّم واسخم م النيلة
توتو:
طيب حاضر أيـوه هاقول
سكلانة:
ما انا عارف إنك مَخْيُـول
توتو:
أهل الصحرا يقولوا عليـك
بوجي وَابُو اصْبَع
زوبة:
ياخْتي عليك!
توتو:
وانتِ يا طمطم، أقصد زوبة
قالوا عليكِ صناعة مضروبة
زوبة:
لعنة عليهم! مليـون طوبة!
سكلانة:
ضربة تشيلهم وانت معاهم
أيه ودّاك يا جاموس ويَّاهم؟
توتو:
انتَ قايل لي أروح وسطيهم
اتجسس واعمـل مداريهم!
سكلانة:
من خيبتك أنا جالي ذهـول
أيه تاني يا حِتِّـة مخبـول؟
ما انا عارف إنك مسطـول
توتو:
بيقولوا علينـا في ماخـور
وزعيمنـا دا أكبر دلـدول
مطبل رقم 1:
كيف عرفوا يا لبخة يا طرطور؟
ينظر سكلانة إلى المطبل رقم 1 شزراً، ثم يتحول إلى توتو.
سكلانة:
وِسْكِتِّ لْهُم؟ قل لي يا تـور!
توتو:
لأَّه، نزلت فيهم تخبيـط
مطبل 1:
واتخيَّطنـا يا ناس تخييط!!
توتو:
ومخطط أجـدع تخطيـط
سكلانة:
خط يعلِّم كده ف خدودك
مطبلة رقم 1:
ما هو باين من شكل جلودك
توتو:
وباجهِّز ف اجدعها خابـور
سكلانة:
امش يا تحفة ف داهية وغور
كل شوية تقـول هاتاويهم
وراح اكتم أنفاس أهاليهم
توتو:
ما انا قلت أغيَّـر موضوعك
توتو:
جتك الشِّكة يا واد ف ضلوعك
دُبدُب:
روح يا منيِّل، شوف ميِّتْهم
توتو:
وحياة سوكة لاهاخرب بيتهم

يخرج توتو مهرولاً إلى أهل الصحراء، ويحاول الاندماج بينهم ثانية كعادته مستطلعاً الأخبار. بينما يخرج سكلانة ومطبلوه إلى المقهى بعد أن أعدَّ خطبة عصماء.

<!-- / message --><!-- sig -->

[ahmed_allaithy]

قـهــوة سُـكَـلانـة_الفصل الرابع_تابع المشهد الثالث والأخير

الفصل الرابع
المشهد الثالث

سكلانة
(يجلس في الشارع أمام قهوته مغلقة الأبواب وهو يلبس جلباباً مهلهلاً)
أمِّـة نكبـة ووش هزيمـة
عايزة الضرب بصرمة قديمة
واحـد زيِّ عليه القيمـة
دبدب
عـامل زي نجـوم السيما
سكلانة
أقعد كده مربوط ف طابون؟
زوبـة
كلُّه عشان سكسوكة يهـون
دبدب
قلبي ياخـويا عليك يتقطَّع
راجل فُلَّـة وأصل ومجـدع
سكلانة
منطقـة نحس وجيـرة ذل
مطبِّـل
خير ان شالله يا سيـد الكل
ليه القهوة مشَمَّعَة باحمـر؟
سكلانة
أصل عليهـا إيجـار متأخر
مطبِّـل
يا نهار كوبية وتِبن مبعتـر!
مطبل (متسائلاً)
طب والمخـزن؟
سكلانة
شَرْحُه كمـان.
زبون سابق (ساخراً)
مانفعش يسدًّه بأكـلان
ما انا عارف شغل مورِستان
مطبل
والسلخانة فـرع المريخ؟
سكلانة
قالوا ريحتها تقولشِ فسيخ.
مطبل
والعزبة بتاعة التفريخ؟
سكلانة (في عصبية)
مش ناقص منك توبيخ.
مطبل
والجبانة ف فرع النُّـوحة؟
سكلانة
دِهْ أَبوابها ليكم مفتـوحة
متفرج
عَملة وباين كده مفضوحة
سكلانة
كيف راح احقق نهضة وثورة
هي فلوسكو يا عالم عـورة؟
ما فيكوش راجل يقدر يدفع ...
معارض
بطَّل م البرشام ده تبلبع
تـوتـو
أنا مشَّحتِف قلبي عليك
دا احنا نبوس ف تراب رجليك
دبدب
وحياة دبدب إوعـاك تزعل
أحسن ضغطك يطلع ينزل
مطبـل
أيه مطلوبك؟ قول يا زعيم
واحنا وراك عزم وتصميم
سكلانة
لِمِّوا يا عالَم كده قرشين
ويَّا سميط وكمان بيضتين
والتحابيش والذي أهو مِنُّه
خلُّوا الحاسـدين منا يجِنُّوا
معارض
نحسد أيه يا عبيط؟ما تفوق!
كل كلامك بقى محـروق
بصِّ القهـوة عليها الضَّبة
عقل الواحد منكم شوربة
معارض
وِأَدِيك قاعـد زي الكُبّة
عامل شيخنا وتحت القبـة
سكلانة
وشرف زوبة انتم مهابيل
زوبة
منحـرفين وبدم تقيـل
معارض
وانتو عصابة ما ليها مثيل
شغل بجاحة فُوقِيه تضليل
معارض (ساخراً)
أصل العلبـة ... جُوَّاها فيل.
سكلانة
مش عايز فمفمة وكلام
أيوه انا عايز فَوْري قوام
تتبرعـوا للقهـوة وليَّـا
معارض
بطَّل بقى شغل الحمـورية
معارض
أيوه ادِّيله، دي ناس حرامية
سكلانة
(هاتفاً في مطبليه)
لازم نرجع بانتصـارات
نملا الزلعة كده بدولارات
ومافيش مانع م الريالات
مطبل
واللي معوش غير الجنيهات؟
سكلانة
نقبل، بس ابعت أو هات.
سكلانة (متسائلاً)
فين الواد أبو مخ تخين؟
ابن النيل، خيبة الفراعين
تـوتـو
ع التِليفون مستنِّي وجاهز
قـايم قاعد: راسي وراكز
(يمسك سكلانة بسماعة الهاتف وينصت)
حورس ابن النيل
انا موجود وفداك يا معلم
طوع إشارتك، قول واتكلم
سكلانة
إنتَ يا واد م اليوم مندوب
تجمع لينـا كل المطلوب
من برّة لبرّة يا مضـروب
واوعى تجيب سيرتي على لسانك
لاخرب بيتك وانت مكانك
فـاهم ولاّ أشـدّ ودانك؟
سكلانة (لمطبليه)
مندوبنـا هيبعت حوالات
باليـورو أو بفرنكـات
أو بالعملة الجبس الهاري
كرشي بيهضم دون سؤالات
زوبة
وبنقبل كـل العمـلات
تـوتـو
يسلم كرشك، راجل سوسة
كل الناس منك مفـروسة
دبدب
مع إن كلامـك ... بسبوسة
متفـرج
باين عايزة تكون له عروسة
متفـرج
خايب الرجا ومعاه متعـوسة
زبون سابق (لسكلانة)
عندي سؤال، تسلم وتعيش
كل شوية تقول ما معيش
مرة تقول فين البقشيش
متفرح آخر
طبعاً غير شغل التهبيش
الزبون السابق
مرة تقول أنا عندي كتير
مرة تقول برسيم لحميـر
مرة الميّة يا ناس مقطـوعة
مرة تسيب الناس ملطوعة
مرة الحِلبـة الناس سرقوها
مرة النَّصْبـة كمان كسروها
مرة انا شامخ، مرة انا واطي
متفـرج
مرة قفاك ع القرش يطاطي!
الزبون السابق
مش مكسوف من خيبتك دِيًّا
ليه ما بترسي لبر شـويّة؟
تـوتـو
كيف تتجرأ على سكلانة؟
عينك فارغة، وعينه مليانة
إنتَ أكيد صهيوني عميـل
وتاريخك في الفَشْر طويل
ع الحاسب أنا عندي دفاتر
راح ادوَّر فيها، وراح اعافر
وَسأقضي عليكَ مِن الآخر
الزبون السابق
اسرح يا اهبل كده ف الحارة
دا انت ما تسْوَى ...
متفرج
عقب سجارة.
سكلانة
مش عايز فذلكة ونصايح
وكلام تافه جاي ورايح
(ثم يوجه كلامه لتوتو وعدد آخر من المطبلين)
لِمّ يا واد كده م الواقفين
ما تخليش ف الجيب مليم
اللي ما يدفعوا دول ضالين
فاهم ولاّ أعيد يا بهيـم؟
تـوتـو
فاهم طبعـاً، دا انا خدامك
تحت مداسك، يعلى مقامك!
(يبدأ توتو وغيره في حث الواقفين على التبرع بعد تقديم الوعود لهم)
ياللا بسرعة كمان وكمان
المشاريب كده بالمجـان
وهتسمعـوا أحلى الألحـان
غير الشيشة، غير الدخـان
اللي حيمشي بجيب مليـان
داهيـة تحـل عليه م الآن.
(يتجة تـوتـو إلى سكلانة بعد أن جمع التبرعات من جماعة المغفلين)
تـوتـو منفعلاً
خد يا معلم، شوف الكيس!
ماحْلى القشوطة والتدبيس!
سكلانة (بعد أن يخطف الكيس من يد توتو)
والله براوة على التخطيط
ناس ما تجيش غير بالتخييط
أَنْصَح بغل تقولشي عبيط
(ثم يشير بيده)
ياللا يا دُبدُب ...
تـوتـو
طيب زوبة؟
سكلانة
(في ضيق)
فُكِّنِي بقى من دي الكركوبة.
افتح إيدك خُد يا منيَّـل
(يلقي توتو من يديه سندويتشاً كان يلتهمه)
اطلع راجل بقى مش عيِّل
آدي مفتاح القهوة يا جحش
افتـح ياللا وبطَّـل حشّ
(يأخذ توتو المفتاح ويقول في دهشة)
تـوتـو
كـ كـ كـ كـ...
سكلانة
انطقّ مالك؟ داهية تصيبك.
تـوتـو
المفتاح ويَّاك، وف جيبك؟
سكلانة
علشان كده ...
دبدب (لتوتو) في خبث، وقد عادت مسرعة
سكلانة دي سيدك.
دبدب (لسكلانة)
فين هتاخدني يا روحي الليلة؟
سكلانة
سهرة يا دُبدُب، حاجة جميلة
(ثم وهو يدس كيس الفلوس في جيبه)
طول ما العالم فيه مساطيـل
تحلى الفرفشـة والتطبيـل
****
وانت يا توتو ف آخر السهرة
قَفِّل، والمفتاح هاتُه بُكـرة.

ينصرف سكلانة ودبدب وهما يقهقهان، وينسدل الستار.

[ahmed_allaithy]

قـهــوة سُـكَـلانـة_مـلـهـاة شـعـريـة

الفصل الرابع
المشهد الرابع

في قهوة سكلانة تحضيراً للخطاب المنتظر
مطبل:
صَقَّفْ صَقَّفْ انت وهوَّه
واهتف ياللا بعزم وقوة
واللي ما بينَّا عشان يتفرج
يستحسن في سُكات يتهوَّى
متفرج:
صَقَّفْ صَقَّفْ؟ لأ، بتهرَّج
مطبل:
أنا لا باهرَّج، ولا ر اح هَرَّق
روح ياللا مْنِ الباب واطَّرَّأ
هي القهوة دي بيتكو يا صايع؟
متفرج (بانفعال):
أنا مش صايع، أنا مش ضايع!
مطبل:
هنا يا تصَقَّفْ، يا تقول حاضر
واللي يعارض، والاّ يمانع
مطبل آخر:
برَّه يا فاجر!
متفرج:
طيِّب اصقف.
مطبل:
زي الشاطر.

يخرج سُكَلانة على الحضور، ويعتلي كرسي خشبي بالٍ، ويبدأ دون مقدمات:
سكلانة:
كل حياتي كفاح ونضال
مطبل لبنان:
أشهدُ إنَّك عال العال
متفرج:
غنِّي علينا، وقول موال
سكلانة (للمطبلين):
اضربوا أمُّه قوام يا عيال!

ينزل المطبلون ضرباً ولكماً على المعلِّق حتى يسيل دمه.

سكلانة:
اسمعوا مني، دا درس تاريخ
معارض:
في التضليل وفوقيه تلبيخ
متفرج:
أما يا ناس راجل بطيخ
سكلانة:
كل الناس تعرفني أصيل
مطبل:
طبعاً دا انت ماليكش مثيل
معارض:
والله ان انت خبير تمثيل
سكلانة:
أنا هاحكي لكم كل طموحي
زوبة:
قول يا حبيبي، تعيش لي يا روحي
سكلانة (يلتفت إلى زوبة):
إنتِ يا زوبة يا غالية أصيلة
متفرج:
قصده يقول لها إنتِ عليلة
متفرج:
مين راح يصبر على دِي النيلة
متفرج:
جمَّعْ وفَّقْ، كُلُّـه رذيلـة
سكلانة (لزوبة):
إنتِ الأصل، وكُلِّك قيمـة
كل فلوسي دي ليكي هدية
معارض:
خمسين ألف يا دكتورة ريمـة
راحوا يا خلق ف شربة ميّـة
سكلانة (في انفعال):
وحياة خالتك لافتح كرشك
معارض:
استحي يا اهبل كده على وشَّك
معارض آخر:
بُص يا ناقص مرة لحالك
معارض آخر:
خاين وبتغـدر بعيالك
سكلانة:
أنا صاحب أكبر مشروع
معارض:
في النهب يا حتة جربوع
سكلانة:
العـالم من غيري هيضيع
وهترجعوا زي الجرابيع
أنا صاحب مليون إنجـاز
وف سكِّتي ماشي بإعزاز
مشاريعي: هنفتح شَفَخَانَة
وهنبني جنبهـا سَلَخَـانَة
واهو بنوسَّع ف الجبـانة
ياللا هتاف: عاش لنا سكلانة
مطبل لبنان:
عاش سكلانة، زعيم الأمـة
متفرج:
أهو بيخرف من دي الحُمَّى
متفرج:
ربنـا يرفع عنـا الغُمـة
سكلانة:
كنت باصارع في الدنمارك
معارض:
لاجل تلِم اليـورو والمارك
سكلانة:
وبادافع عن أهلي ف غزة
معارض:
دا انت موسادي، عديم العِزة
سكلانة:
كُلُّكو يعرف إنِّي كبيـر
معارض:
في الحمورية، وفِ التغرير
سكلانة:
أنا عندي لمشاكلكو حلول
معارض:
إنت يا واد حتة دلدول
معارض:
لما اسيادك يرضوا، تقول
سكلانة:
ليَّا في كل الأرض حبيب
معارض:
زي زعيمك سوسو الذيب
معارض:
تستاهلوا ضرب القباقيب
سكلانة:
أنا مش عايز غير تمويل
معارض:
بطَّل ياد شغل التهبيـل
معارض:
معروف إنك لص عميل
سكلانة:
أنا أعظم من أي زعيـم
معارض:
أصله بيفطر ع البرسيم

يـتـبـع

<!-- / message --><!-- sig -->

[ahmed_allaithy]

قـهــوة سُـكَـلانـة_ خـاتمــة

يتدخل توتو فارداً ذراعيه ليحمي سكلانة من وابل الردود، وهو يصرخ:
تـوتـو:
نفدي زعيمنا بكل ارواحنا
سكلانة:
قلها يا توتو كده وريَّحنـا
توتو:
مش هنسيب للغير مطرحنا
مطبل (وقد تنبَّه):
اسكت يا اهبل يا مسوَّحنا
معارض:
انت يا واد تايه مسكين
غاوي تحارب ف الطواحين
سوكة وزوبة ...
معارض آخر:
عليك لايقين.
مطبل (وقد تنبَّه):
انتَ يا واد مش ليلة امبارح
قلت دا سوكة حرامي وقارح
سكلانة:
انت بتشتم فيَّا يا كالح؟!
توتو:
أنا مش فاكر ...
مطبل (وقد تنبَّه):
اعمل ناكر.
أما منافق مالهوش آخر
سكلانة:
امشي يا تافه، كلب جاسوس
يا حثالـة وستين موكـوس!
دا انت حقير، نعل وملبوس
شفتوا السافل؟ شفتوا الخاين؟
كنت بداري عليـه وبمـاين
وكمان عندي عليه دوسيهات
وفضايح واسْـوَدْ حكـايات
توتو:
أنا تفضحني، يا سوكة يا مايع؟
طب هتشوف يا حرامي يا صايع
سوكة قايل لي أروح واتجسس
للأخبـار أنقـل واتحسِّس
مطبل (وقد تنبَّه):
أخبار مين يا منيِّل قـول؟
دا انت كلامك مش معقول!
توتو:
أخبار كل الناس ف القهـوة
وانا باتسحَّب وآجي على سهوة
واسمع من ده، واشوف مين قال
وارفع بيـه تقرير ف الحال
مطبل (وقد تنبَّه):
كل ده ليه يا غراب البين؟
توتو:
أصله واعـدني بالملايين
قال لي هاكون ريِّس سلخانة
مطبل (في تردد):
انت الريس؟ أمَّـا إهـانة!
نفس كلامك ده قَالْهُـولي
أما حقير نصـاب ووصولي
توتو:
كل دا غير شغل العمولات
(ثم وهو يشير إلى جميع المطبلين والموجودين في القهوة)
والتهلـيب م المرمطـونات
ادفعوا ياللا، دا كرشُه راقات.
عارفين مين نائب سكلانة؟
مطبل: أنا.
مطبل: أنا.
مطبل: أنا.
مطبل: أنا.
مطبل: أنا.
مطبل: أنا.
مطبل: أنا.

يضحك المتفرجون وقد اكتشفوا اللعبة، بينما ينظر المطبلون بعضهم إلى بعض وهم يتميزون من الغيظ لافتضاح بلاهتهم وسذاجتهم.

سكلانة (وقد فرغ صبره):
اطردوا كلب الصحرا الدون
زوبة:
طبعـاً، فـوراً، واد مجنـون!
سكلانة (للمطبلين):
ياللا يا ربعي
زوبة:
ليـه واقفين؟
مطبل (وقد تنبَّه):
أما صحيح شلة مجانين!
آخر:
ومنافقين!
شنبر:
سوكة دا حِتَّة ندل وmean*
آخر:
وانت يا زوبة عديمة الدين
دبدب والمطبلة رقم 1 (مدافعتين عن سكلانة وزوبة):
دبدب:
لأ، مش ممكن، ناس وحشين!
مطبلة رقم 1:
أيوه يا ظَلَمة، يا مش نافعين!
سكلانة:
أنا مش هاقبل منكو إهـانة
يا انتو علينا؟ يا انتـو معانا؟
مطبل (وقد فاض به):
اسمع يابن صفيحة وعضمة
احنا معـاك وعليك بالجزمة
جميع من بالمقهى:
احنا معـاك وعليك بالجزمة.
احنا معـاك وعليك بالجزمة.

يخلع جميع الحاضرين نعالهم وينزلون بها ضرباً على رأس سكلانة وتوتو وزوبة ودبدب والمطبلة رقم 1، وبينما هم يصرخون ويتأوهون ينسدل ستار النهاية.

***
mean: أي دنئ، وضيع، حقير.
***

[ahmed_allaithy]

قـهــوة سُـكَـلانـة _ خـاتمــة

وآدي يا جماعة الخير حكايتنا
ناس م الحتة، وساكنة ف بيتنا

واحد فاكر نفسه كبير
كدب ونصب ومن ده كتير
خدعة وسرقة وكوم تغرير
ناس بتصقف دون تفكيـر
ناس بتنهق شغل حميـر
ناس متباعة وما لها ضمير
ناس تتلـون دون تأخيـر
ناس بتكافح تنفخ كيـر
ناس من ذل الجبـن تغِير
ناس في الخيبة ما ليها نظير!

لكن الحق حياتنا وموتنا
ولازم تعلى معاه كلمتنـا.

[ahmed_allaithy]

_md_re: قـهــوة سُـكَـلانـة _ إصدار خاص

.......................