مسرحية ساخرة: اجتماع قسم اللغة العربية والترجمة

[ahmed_allaithy]

اجتماع قسم اللغة العربية والترجمة
في جامعة عربستان
ملهاة من مشهدين
*****

المشهد الأول

إسماعين (يمر على المكاتب):
يا جماعة فيه اجتماع
وانتو لسَّه مطنِّشين؟
اللي نايمة، واللي ضاع،
واللي مش داري ده فين!
ياللا ياللا خلصـونا
هِمُّـوا يعني شويِّتين.
وَكْوَك (تتظاهر بالحديث في التليفون):
قل لهم يِسْتَنُّوا حَبَّـة
فيه مكالمة من أورُبـا
أصل أم كوين إليزابيس
طالبة منِّي حديث وخطبة
غاوية تِرْغي، جنِّنِتْنِـي
عاملة مِ الحَبَّة دي قُبة.
شامل:
هو ده الْفَشْر المِأصَّل!
إسماعين:
يِِلْزَمُه شَدِّة مِعَسِّـل!
شامل (لاسماعين وهما ينصرفان):
ياللا بِينَا يا اسماعين
عايز اعَدِّل النافوخ
شدَّة والاّ شدِّتين
صوتها في وداني صاروخ
إسماعين
ربنا يصبَّرنا، غالب!
دي المرارة هَتِتْفِقِع
دنيا فيها الجحش راكب
والبشر يمشي يُقع.
وَكْوَك (بعد انصراف شامل واسماعين):
جتكوا نيلة، ف داهية روحوا
اجتماع متخلفين
آدي دقني، راح تدوخوا
حالفة أصلي مية يمين.
يجتمع القسم ويجلس الحضور حول طاولة الاجتماعات
إسماعين:
في بدايـة الحـوار
شكري ليكم شكر حار
عندنا اليوم أجنـدة
حبَّة ذاكَ، وحبَّة من ده
نِقْلِب الموضوع ونمشي
بالهوادة ... ودون شجار!
وَكْوَك (مقاطعة):
لما كنتُ في بورُندي
كنا نعمل اجتماع
للمناقشة للمحاورة
أو نقـرر في البتاع.
حليم (بنفاد صبر):
حرام يا عالم! حرام عليكي!
هاتيها ياللا أبوس أديكي
أهيه بورُندي فاتحة دراعها
كمان بتنده أهوه عليكي
سالم:
ملعون بورُندي وست أبوها
إلهـي تِفْطَس ويحرقـوها
إسماعين:
بلاش مناكفة، نظام بليز
إحنا أساتذة ومُش معيز
عايزين نخلَّص نِرُوح بيوتنا
أحسن قُعادنا ده مش لزيز
شعبان:
عندي مداخلة، لو تسمحولي
في كلمة واحدة، ولو مروري
هاقـولها يعني بدون مؤاخذة
عشان دي حاجة أكيد ضروري
سالم:
الصبر منك يارب نعمة
يا عم خلَّص، مالوهش لازمة
إنتَ بتخطب هنا ف جنازة
شامل (ضاحكًا):
العقل عنده واخد أجازة!
إمام:
تقول دي كلمة، نلقى عريضة!
مكتوب علينـا زي الفريضة
رَشْرَش:
أنا معترضة ومش هارتاح
إلا نْنَّاقش أمـر خطيـر:
كورس الهيريتيج باليونيفورم
ولاَّ كمان نلبس طراطيـر؟
شامل (منفعلاً):
يا مثبت عقل المساطيل
صبَّرني، دا عقلي وهيطير!!
وَكْوَك:
شوفي يا رَشْرَش أمر بسيط
أنا في بورُندي -ودون تخطيط-
كنت أروح كده بالتاييـر
حتى ساعات نلبس زعابيط!
شامل (يتعجب بصوت منخفض):
والله ده مخك بقى عصافير!
شعبان:
روحي هتطلع منكو يا ناس
من أصغركو لأكبـر راس
عايز اتكلم وامشي ف حالي
نفسي اروَّح بقى لعيـالي
وَكْوَك:
قول يا حبيبي وقلبي داعي لك
بس اتلحلح، هزِّ ف طولك
أنا مش هانطق، بس خلاص
ولا هاتكلم عـام أو خاص.
كل كلامي واقف في الـزور
شامل:
إنتِ لازم لِك رفسة تـور!
أحلام:
ممكن أفهم حاجة، يا ريت
حد يقول لي وصلنا لفين؟
سالم:
فيه موضوع محتاج تصويت
أم السعد:
أنا جاهزة لكو صراخ وصويت
(ثم وهي تعدد كالنائحات)
لهوي، يا لهوي، ع اللي انا فيه!
راح ف شبابه، يا حسرة عليه!
ما اعرف أيه بس اللي جرى لُه!
كان وسطينا، اتشقلب حاله!
سالم (مقاطعًا):
يا "ام السعد" الله يهديكي
داهية تشيل من كان يعاديكي
تصويت يعني برفع الإيد
مش باللطم نعيد ونزيد
أم السعد:
أَهْ، تصويت يعني من التاني؟
أصل هوايتي صويت حياني!
خيرها ف غيرها، ياخويا نسيت
سالم:
نرجع تاني نقول تصويت
أحلام:
أنا راح اصوَّت بالاتنين
أيوه ولأَّه ...
إمام:
... الصلاة ع الزين
(ثم وهو يدندن):
الصلاة ع الزين، الصلاة ع الزين
اجري بسرعة يا واد حسين
شوف لنا ريري بيتباع فين
أم نعيمة تقـول نعمين
واحنا نصـوَّت بالاتنين
إسماعين (بضيق):
نرجع تاني بقى لموضوعنا
شعبان:
أصلِ تْعِبْنا ودُخْنا وجُعنا
إسماعين:
فيه في البَدجِت كام سحتوت
إمام:
كام كتكوت؟
إسماعين:
يابْني افهم بقى مش معقول
نرجع تانـي نعيد ونقـول!
شامل:
باين إنه مقرقش فـول!
إسماعين:
لازم تخْلَص دي الميزانيـة
مين عنده اقتراحات ...
حليم:
... وردية؟
نعمل إعلان في الجرنان
مطلوب شابة رشيقة جْنان
متربية وبنت بنـوت
أمها ماتت، أو هتموت
لو قلت لها أنا أي كلام
تبقى في إيدي عجينة قوام
سالم:
صحصح يابْني بلاش أوهام
يخرب بيت عيشة العزوبية
خلت عقلك بقى ملوخية.
رَشْرَش (بهدوء):
طب أنا رأيي نجيب برغوتي
سامعين والاَّ أعلِّي فْ صوتي؟
أم السعد:
برغوت مين ده؟ اسم الله عليكي
هي الجامعـة تعـوز براغيت؟
رَشْرَش:
برغوتي شاعر ...
أم السعد:
أنا من رأيي ترشي البيت
بالموتولوف أو بالمبيدات
والبراغيت هتصير أموات.
أحلام:
أنا من رأيي عزومة جميلة
وسط جناين، وسط نجيلة
ونجيب فيها ...
سالم:
... صحن بليلة؟
إسماعين:
والنارجيلة؟
شعبان:
طويلة التيلة
إمام:
ونغني ...
شامل:
آه يا خيبة تقيلة!
وَكْوَك:
والنبي ياخْتي، كلامك زين
(يدق الجوال)
لحظة أرد على التليفون
(على الجوال)
رايحة أهاتفِك أنا بعدين.
قلتي منين؟
طيِّب فين؟
لأ، في بورُندي...
بنغالي، أو يمكن هندي ..
كنت هاقول لك ...
لأ مش عندي ...
شعبان (وهو يشد في شعره):
أنا في جهنم.
إمام:
صح، يا فندم.
سالم:
تفتح بقك، لازمًا تندم.
مرتضى:
طب نعمل معرض تصاوير
ونصور فجـل وجرجير
كام بوستر من هنا وهناك
راح نعمل جوّ وتغييـر
إمام:
أو سهرة ...
وَكْوَك:
... ويحضرها مدير
الجامعة، وأكبرها كبير
وعميدنا،
سالم (متهكمًا):
وتصفيق تهليل!!
وَكْوَك:
نعمل حاجة ماليها مثيل
إمام:
مع رقص وحبِّة تطبيل
حليم:
قول تهبيل ...
شامل:
وفضيحة مركِّبة شخاليل
سالم:
جوة العلبة هيطلع فيل.
حليم:
بالتأكيد هنروح في كازوزة
إسماعين (محدثًا نفسه):
كان مفروض أنا جبت الجوزة
حليم:
حد يسكِّت دي الأراجوزة!
إسماعين (محدثًا نفسه):
باين القعدة أكيـد هتطوِّل
أحلام:
أنا من رأيي نعيد مِ الأول.
وَكْوَك (مندفعة):
لما كنتُ في بورُندي ...
سالم (مقاطعًا):
أحلف إنُّه خراب مستعجل.

[ahmed_allaithy]

المشهد الثاني

المشهد الثاني

سالم (يدخل فلا يجد أحدًا):
كل مَرَّة آجـي بدري
ما القى حد من الحضور
وَاقْعد انْكُت، واقْعد اهْري
زي ساقيـة وفيها تـور.
(وبعد لحظة صمت)
إنْ حَد مَرَّة وجِه فْ معاده
أحلف أرقيـه بالبخـور.
***
يدخل الجميع وهم يتحدثون ويضحكون محدثين جَلَبة بينما يأخذون مقاعدهم
إسماعين (منفعلاً وهو يصفق بيديه):
أرجو منكم الهـدوء
أصل إحنا مش في سوق
عايز اخلَّص المناقشـة
لاجل أمشي واروح أنام
أصل عندي صداع ماسكني
فاسمعونـي بدون كـلام
النهـارده فِ اجتماعنا
عايز ابيِّن الفـروق ...
إمام:
بسِّ إهـدا،
سالم:
بس رُوق.
إمام:
سيبني اغَنِّي لاجل تِهْدا
أصل ضغطك يعني فوق.
إمام (يدندن ويغني):
ياللي ناسي ودّ صافي
لو فِ مرة تقول عوافي
تلقى قلبي تحت رجلك
حتى لو هتجيلنا حافي
حتى لو هتجيلنا حاااااافي
إسماعين (منفعلاً):
عقلي شَتّ يا ناس، كفاية!
إمام:
اهدا بس وقول معايـا
وَكْوَك (لإسماعين):
ليـه يا خويا، بسّ مالك؟
تشقي، تتعب، مكتوبة لك!
بس خدها نصيحة منِّي
جربوها في نفس حالك.
في بورُندي كنت بآخد
حبهان معجون بشيح
معلقة والتانيـة تصبح
في الكلام كتكوت يصيح
رَشْرَش:
والله وصفة في الصميم!
حليم:
تقلب العاقل ..
سالم:
بهيــم؟
قصدي يعني أقول "زعيم".
بس يعني يا أستاذتنـا
وصفتك مالهاش علاقة
باجتماعنا. ومصيبتنا ...
حليم (مقاطعًا):
بسّ، لتجيب لك إعاقة!
وَكْوَك:
إنتو ناس ما بتفهموش
خبرتي ما تقَـدَّروش
أنا عنـدي ...
سالم (مقاطعًا):
... دُكتـورار
فِ الْمِناكفة والشجار
وَكْوَك:
حتى فرق الرانك rank بينَّا
فيكو ناس ما تعرفوش
داهية فيكم، ناس فَشوش.
سالم:
حد عايز رانك محشي
أو متبِّل، جنب طُرشي
عنـدنا بلاص مِعَبِّي
رانك مِنُّه البطن تمشي.
وَكْوَك:
إنتَ دايماً مضطهدني
كل كلمة تكون قاصدني
عندكم حقد وأكيد
اشتكيكم للعميد!
شعبان:
العميد، والمدير!
ربنا يجعله خير!
شامل (يقلب كفيه):
حتى في عز الخنـاق
مسح جوخ وكمان نفاق؟!
إسماعين (وهو يحاول أن يتمالك نفسه):
كنت في الأول باقـول
-قبل ما يصيبني الذهـول-
اجتماعنا في الفـروق ...
حليم (مقاطعًا):
في الحقوق؟
شعبان:
في الشقوق؟
أم السعد:
مين ما يعطس مِ النشوق؟؟
رَشْرَش:
هو أيه يعني النشوق؟
أحلام:
النشوق ده مُخدرات
شمَّة واحدة خد وهات
تلقِي نفسِك في التمام
حليم:
تبقي عايشة في الهيام
والموسيقى ع الدوام
إسماعين (صارخًا):
في الفروق، في الفروق!
قِسم دهْ والاَّ خازوق؟
في الفروووق
بين نظام الأيه يو إس ...
إمام (مقاطعًا):
كُلُّه يسمع! كُلُّه هُس!
لما بُص boss القعدة ينطق
الجميع يسكت ونص
وَكْوَك:
قول يا غالي، أكيد معاك
سالم:
قول بوشَّك أو قفـاك
أم السعد:
دا انتَ برضه يا خويا منَّا
رَشْرَش:
واحنا يوم السعد جالنـا
يوم صِبِحْت رئيس علينا
دَا فْ غيابك شحتفـونا
طلَّعـونا ونزِّلـونا
وَكْوَك:
وقيِّمـونا وبهدلـونا
حليم:
حتى في البدروم سابونا
أم السعد:
حسرة علينا، يا حسرة علينا!
إمام (يدندن):
حسرة علينا، يا حسرة علينا!
أحلام:
ده انت برضة تشير Chair بتاعنا
نوَّارتنا في اجتماعنـا
وَكْوَك (في فزع):
إنتي قلتي أيه؟ نوار؟
والله هيصيبني الدوار!
شايفة كل الدنيا كحلي
يوم ما يطلعلوش نهار!
لبني (تحاول تهدئتها):
إهدي بس، شهيق زفير
هيَّ طاسة الخضة فين؟
سالم (هامسًا لأحلام)
قولي في ودانها "المدير"
هتلاقيها تنط زيـن
إسماعين:
داهية سودة، ويومكو طين
أدعي رب العالمين
يبتليكو بهيد head أقرع
يمشي بيكو ع العجين!
ممكن ارجع للكلام؟
أم السعد (لإسماعين وللجميع):
قول يا خويا. صمت تام!
قول وحدِّث في النظام
واحنا راح نبصم قوام
أحلام (في انفعال):
انتِ مكشوف لِك حجاب
حتى بُصِّي في الجـراب
جايبة اهوه الختَّامة جنبي
نص أزرق، نص بَمْبِـي
لونها غاية في الجمـال
أم السعد:
لون بيسرح له الخيال
رَشْرَش:
لون شياكة، وبصم عال
شعبان:
لون تِغِير منه البغـال!
وَكْوَك:
خَـرَابيش، بَـرَابيش
شكلكم شاربين حشيش
أمَّا حِتِّة لون سخيف!
في بورُندي ربيع وصيف
كنا نبصم ليل نهار ...
حليم (مقاطعًا):
في الصحاري والقِفار؟
إمام:
ع الْمِخَلِّل بالْفِشـار
سالم:
بعدها يجيلك شُحـار.
شامل:
بس ما كان فيه انتحار؟
شعبان:
أو هـزار بسمّ فـار؟
وَكْوَك:
إنتو أسخف م السخافة
حتى تعليمكم هيافـة
سالم:
أصل تعليمي فْ بورُندي
وَكْوَك (في غضب):
اسكت، اخرس يا أفندي!
سالم:
علِّموني باللاونـدي
وشرَّبوني يوسْتَفَندي
كنت فاكرُه تمر هندي!
إمام (يدندن مبتسمًا):
حبَّة عندك، حبة عنـدي
(ثم يشير لإسماعين)
ياللي ناسي ودّ صافي
لو فِ مرة تقول عوافي
تلقى قلبي تحت رجلك
حتى لو هتجيلنا حااافي
إسماعين (مستسلمًا ويدندن مع إمام):
قول عوافي قول عوافي
ياللي جبتولنا الكَّوافي
واجتماعنا مش هَنِصْرِف
لُهْ مِ البَدْجِت budget إضـافي.
ابصموا لنا وخلَّصونا
تبقى فايدة خرجنا بيها
يعني هو قسم ابونا؟
مَلْعونَة الجامعة وما فيها.
انتهى.

برغوتي: الشاعر تميم البرغوتي
نوار: شخصية يسبب ذكرها العصبي عند وَكْوَك
بُص boss: رئيس
تشير Chair: رئيس قسم
هيد head: رئيس قسم
البدجت budget: الميزانية

[s___s]

الله يرحم أيّام الأتوبيس
يا د. أحمد الليثي هو أنا اسمي مش موجود؟
والا غيروه لسالم؟
ما رأيكم دام فضلكم؟

[ahmed_allaithy]

الله يرحم أيّام الأتوبيس

يا د. أحمد الليثي هو أنا اسمي مش موجود؟
والا غيروه لسالم؟

ما رأيكم دام فضلكم؟

الله يرحم الأتوبيس نفسه يا أبو صالح.
أما سالم، فبكل تأكيد ليس أنت.
ودمت "صالحًا"

[s___s]

الله يرحم الأتوبيس نفسه يا أبو صالح.
أما سالم، فبكل تأكيد ليس أنت.
ودمت "صالحًا"

أظن ما حصل في الرابط التالي يا د. أحمد الليثي سيعطيك إلهام لمشهد ثالث

http://www.atinternational.org/forums/showthread.php?t=8251
ما رأيكم دام فضلكم؟

[s___s]

أظن ما حصل في الرابط التالي يا د. أحمد الليثي سيعطيك إلهام لمشهد ثالث

http://www.atinternational.org/forums/showthread.php?t=8251

ما رأيكم دام فضلكم؟

الظاهر يا د.أحمد الليثي أن الزول مُصر على كتابة فصل آخر للمسرحية
ما رأيكم دام فضلكم؟

[ahmed_allaithy]

فاصل بين مشهدين



إمام (يدخل منفعلاً):
أيْـوة لأَّه، أيْـوة آه
أيْـوة لأَّه، أيْـوة آه
إسماعين (متعجبًا):
حُكْم رَبِّي، وْدَهْ قضـاه!
(ثم لشعبان وحليم)
إسحبوه، كده من قفـاه
(موجهًا كلامه لإمام)
إهْدَى يابني وقُلْ لِي مالك
أيه مشقلب لك ف حالك؟
إمام:
أصلي خدت الدكتوراه!
شعبان:
يعني قيمة كمان وجاه!
سالم:
ألف مبروك ليك يا غالي
إمام:
ربي حقق لـي آمالي.
(يلتف الجميع حول إمام لتهنئته)

وَكْوَكْ (محدثة نفسها):
حاجة تقرف! هي ناقصة؟
جتكو نيلة، وجتكو قرصة!
بكرة هاقلبهالكو ضلمة
لاجل تبقوا فْ خيبة دايمة.
تبقى دُكتور؟ ليه يا اخويا
مشرحة وناقصة قتيـل؟
دا انت لسه ف سنة أولى
حتى دمك يـاه تقيـل!

(ثم ترفع صوتهامحدثة إمام):
قلبي فرحان لك يا مومو
(للجميع)
ياللا فِزُّوا، وهِمُّوا قوموا
ياللا نعمل له احتفـال
أصلـه يستـاهل وعال.

وكوك (محدثة نفسها)
بكرة ياكل بالنعـال.

(لا يزال الجميع منشغلين بالتهنئة، ثم ينصرف إمام)

سالم:
والله جون رائع وجامد!
يعني كله ف رانك واحد
وَكْوَكْ:
والله ما تِسْوَى الرؤوس.
سالم:
ست دي والا جاموس؟
إسماعين:
عقل ضلمة، يعوز فانوس
رشرش:
لأه، يا وكوك، مش معقول
وِش نواعمي، ووش لغول؟!
وكوك:
مين بقى غولة؟
رشرش:
إنتِ يا وَكْوَك، مش معقولة!
وكوك
ربي يوكوك (يسوِّد) كل ايَّامك
يِخْلِف بين لَحْمِكْ وِعْضَامِك
يجعل اللي وراكي قُـدَّامك.
أنا غلطانة يا وش القـرد؟
(ثم تلتفت للحاضرين استجداءً لتعاطفهم)
شوفوا لَمَّا ابْني، وهيَّ تْهِد!
رشرش
مالِك طايحة، ماليكش كبير؟
عاملة ف كل أمورنا خبير
كل الناس مَلْهِيَّة فْ حالها
وانتِ عليكي دستة مناخير
تحشري واحدة ف هذا وذاكَ
وتحشري غيرها ف شأن الغير
عاملة النَّمِّ لبانة فْ بُقَّك
لَمَّا زْهِقْنا غيبـة وتشهير
وكوك
وحياة ربي هاسوِّد عيشِك!
رشرش (في تحدٍ):
ياللا تعالي بقى انتِ وجيشك
وكوك
يبقى يا ناس أفضالي عليها؟!
سالم (ساخرًا)
قومي يا رشرش بوسي رجليها.
رشرش
أفضال أيه، يا خبيـرة الْحَشّ؟
دا انتِ ما تعرفي فضل لجحش!
وَكْوَكْ (في تظاهر واضح):
أنا راحَ اسُورَق؛ هَوُّوا عليَّا
(ثم تسقط على الأرض متظاهرة بفقد الوعي)
رشرش:
دِه بتمثِّل، أصلها حيِّـة!
إسماعين:
ما هو حافظين كل الحركات
مرة صويت، والتانية آهات.
سالم:
أنا من رأيي دي فرصة وجاتنا
لاجْل نعـوَّض كل ما فاتنـا
حليم:
قصدك أيه؟ ما تقول رسِّينا!
سالم (وهو يدور حول وكوك )
عندي انا خطة وبنت لذينا
حد يروح ويجيب لي ملاية؛
وهاكفِّنها، لو انتو معـايا!
حليم:
يسْلَم فُمَّك، طلبك حاضر.
سالم:
طيب، عجِّل زي الشاطـر.
اجري بسرعة ما تتأخـرش
أصل دي فرصة ما تتعوضش
حليم:
ثانية وهارجع بالمطلـوب
سالم (أثناء انصراف حليم):
هات لي معاك كام دبشة وطوب
شعبان:
فكرة عظيمة يابو الأفكـار!
إسماعين:
والله ذكـاءك طلقة نـار
شامل:
إيدي ف إيدك قبل ما تصحى
واهو في الضلمة تغيب أسرار
أحلام:
طيب يعني ما فيهش جنازة؟
سالم (متهكمًا):
لأ، هنقول إنها في أجـازة.
أحلام (في انفعال وفرح):
فكرة عظيمة، مُناسبة جْنان!
يلزم لها كـده كام فستان
واحد موڤ، والتاني كاروه
غير السادة، غير الألوان
من ڤيرساتشي، وعند ديور
غير النيلة بييـر كاردان
إمـام:
وانا من عندي راح اعمل سهرة
وهتسمعوا أحلـى الألحـان
هانزل رقص، وهات يا أغاني
ما تقولِّيش سيِّـد زيَّـان
أم السعد:
وانا راح اعدِّد بالمجان
حسرة عليكي، يا حِزْن شبابك!
لما الموت خبَّط على بابك
إقروا الفاتحة عليها وقولوا
مش هَيْـأَثَّر فينـا غيابك
(يعود حليم بملاءة ويقترب من وكوك للمشاركة في تغطيتها بها)
سالم:
ياللا بسرعة، وهِمُّوا قوام
(وهو يشير لأماكن وقوفهم)
إنتو هناك، وانا من قدام
واحد يخلع ياللا مداسها
شعبان:
بس أنا خايف لتكون صاحية
سالم (وهو يهم بتغطية وجهها بالملاءة):
لحظة وهاكتم لُكو أنفاسها
أحلام (من جهة رأس وكوك):
أيوة، دا أسهل من دي الناحية.
وكوك (وهي تجلس فجأة، وتقول مغتاظة)
لأه، سيبوني، يا خَوَنة، حـرام!
عايزين تخلصـوا مني قـوام
رشرش:
مش قلتلكم ده تمثيـل
(يضحك الجميع)
سالم:
مش محتاجة يا ست دليل
ما هو فاقسين حركاتها خلاص
شامل:
داهية تشيـل وش البلاص.
سالم:
واهو مَثِّلْنـا شوية عليها
يمكن عقلهـا يرجع ليها.
وكوك (تندب حظها وتتباكى لرشرش):
بقى دا جزاتي، يا رشرش يا ختي؟
آه من حظـي! يا مِيلِة بختـي!
سالم:
رجعت تاني تجرجر ناعم!
إسماعين:
شغل شيطاني، وخبثها دايم
حليم:
ديل القـرد ما يعدله قالب
ربي عليكي، وربنـا غالـب
سالم:
هي دي وكوك، عيشها مقالب.